കേരള കാര്‍ഷിക സര്‍വ്വകലാശാല
Kerala Agricultural University

കേരളത്തിലെ കാര്‍ഷിക വിദ്യാഭ്യാസ ചരിത്രത്തിന്റെ തുടക്കം 1896 ല്‍ ഏതാനും ചെറുപ്പക്കാരെ ശാസ്ത്രീയ കൃഷി പരിശീലിപ്പിക്കുന്നതിനായി തിരുവനന്തപുരം ജില്ലയിലെ കരമന ഡെമോണ്‍സ്ട്രേഷന്‍ ഫാമില്‍ (ഇപ്പോള്‍ കേരള കാര്‍ഷിക സര്‍വ്വകലാശാലയുടെ കീഴിലെ ഇന്റഗ്രേറ്റഡ്‌ ഫാമിംഗ്‌ സിസ്റ്റംസ്‌ റിസര്‍ച്ച്‌ സ്‌റ്റേഷന്‍) ആവിഷ്ക്കരിച്ച് നടപ്പിലാക്കിയ പരിശീലന പരിപാടിയിലൂടെയാണ്‌. 1922-ല്‍ എറണാകുളം ജില്ലയിലെ ആലുവയില്‍ ഒരു അഗ്രികള്‍ച്ചറല്‍ മിഡില്‍ സ്‌കൂള്‍ ആരംഭിച്ചതോടെ സംസ്ഥാനത്തെ മിഡില്‍ സ്‌കൂള്‍ ക്ലാസുകളില്‍ കൃഷി ഒരു ഐച്ഛിക വിഷയമായി അവതരിപ്പിക്കപ്പെട്ടു. ഈ സ്കൂളിന്റെ ജനപ്രീതിയും പ്രചാരവും 1928-ല്‍ കൊട്ടാരക്കരയിലും 1931-ല്‍ കോന്നിയിലും സമാനമായ സ്ഥാപനങ്ങള്‍ ആരംഭിക്കാന്‍ കാരണമായി.

പിന്നീട്‌ 1953-ല്‍ കേരളത്തില്‍ ഇന്റര്‍മീഡിയറ്റ്‌ കോഴ്സിന് കൃഷി ഒരു ഐച്ഛിക വിഷയമായി നടപ്പിലാക്കുകയുണ്ടായി. തുടര്‍ന്ന്‌ 1955-ല്‍ മൃഗ ശാസ്ത്രരംഗത്തെ ഉന്നത പഠനത്തിനായി പഴയ തിരുവിതാംകൂര്‍-കൊച്ചി സര്‍ക്കാര്‍, തിരുവനന്തപുരം വെള്ളായണിയിൽ കാര്‍ഷിക കോളേജും ഗവേഷണ സ്ഥാപനവും, തൃശ്ശൂര്‍ മണ്ണുത്തിയില്‍ വെറ്റിനറി & മൃഗശാസ്ത്ര കോളേജും ആരംഭിച്ചു. കൃഷി വകുപ്പിന്റെയും മൃഗസംരക്ഷണ വകുപ്പിന്റെയും നേരിട്ടുള്ള ഭരണ നിയ്രന്തണത്തിലായിരുന്ന ഈ സ്ഥാപനങ്ങളെ 1956-ല്‍ കേരള സംസ്ഥാനം രൂപീകരിച്ചതോടെ കേരള സര്‍വ്വകലാശാലയുമായി ബന്ധിപ്പിച്ചു. ബിരുദാനന്തര ബിരുദങ്ങളായ എം.എസ്സി. (അഗ്രി), എം.വി.എസ്‌.സി എന്നീ കോഴ്സ്സുകള്‍ യഥാക്രമം 1961, 1962 വര്‍ഷങ്ങളിലും ഗവേഷണ ബിരുദം (പി.എച്ച്‌.ഡി.) 1965 ലും ആരംഭിച്ചു.

യൂണിവേഴ്സിറ്റി ഗ്രാന്റ്‌ കമ്മീഷന്‍ ചെയര്‍മാനായിരുന്ന ഡോ. ഡി.എസ്‌. കോത്താരിയുടെ നേതൃത്വത്തിലുള്ള രണ്ടാമത്തെ ദേശീയ വിദ്യാഭ്യാസ കമ്മീഷന്റെ (1964-66) ശുപാര്‍ശ പ്രകാരം ഓരോ സംസ്ഥാനത്തും ഒരു കാര്‍ഷിക സര്‍വ്വകലാശാല എന്ന നയം നടപ്പിലാക്കുന്നതിന് തീരുമാനിക്കുകയുണ്ടായി. രാജ്യത്തെ കാര്‍ഷിക വിദ്യാഭ്യാസത്തിനും ഗവേഷണത്തിനും ആവശ്യമായ പ്രചോദനം നല്‍കുന്നതിനായി ദേശീയ കാര്‍ഷിക ഗവേഷണ സംവിധാനത്തിന്റെ അവിഭാജ്യ ഭാഗമായാണ് സംസ്ഥാന കാര്‍ഷിക സര്‍വ്വകലാശാലകള്‍ (എസ്‌.എ.യു.) സ്ഥാപിതമായത്‌. തല്‍ഫലമായി 1971-ലെ ആക്റ്റ്‌ 33 പ്രകാരം 1971 ഫ്രെബുവരി 24-ന് കേരള കാര്‍ഷിക സര്‍വ്വകലാശാല (കെ.എ.യു.) സ്ഥാപിതമാകുകയും 1972 ഫ്രെബുവരി 1-ന് പ്രവര്‍ത്തനം ആരംഭിക്കുകയും ചെയ്തു.

1971-ലെ കെ.എ.യു. നിയമത്തിലെ വ്യവസ്ഥകള്‍ക്കനുസൃതമായി, വെള്ളായണിയിലെ അഗ്രികള്‍ച്ചറ൪ കോളേജ്‌ ആന്‍ഡ്‌ റിസര്‍ച്ച്‌ ഇന്‍സ്റ്റിറ്റൂട്ട്‌, കോളേജ്‌ ഓഫ്‌ വെറ്ററിനറി ആന്‍ഡ്‌ അനിമല്‍ സയന്‍സസ്‌, മണ്ണുത്തി എന്നിവ കേരള കാര്‍ഷിക സര്‍വൃകലാശാലയുടെ കീഴിലേയ്ക്ക്‌ മാറി. കൂടാതെ, വിവിധ വിളകള്‍, മൃഗങ്ങള്‍, പക്ഷികള്‍ മുതലായവയെക്കുറിച്ചുള്ള ഗവേഷണ-വിജ്ഞാന വ്യാപന പരിപാടികള്‍ ഏറ്റെടുക്കുന്നതിനായി ഇരുപത്തിയൊന്ന്‌ കാര്‍ഷിക, മൃഗസംരക്ഷണ ഗവേഷണ ക്രേന്ദങ്ങളും കെ.എ.യു - വിലേക്ക്‌ കൈമാറ്റം ചെയ്യപ്പെട്ടു.

2011-ല്‍ കേരള കാര്‍ഷിക സര്‍വ്വകലാശാലയെ കേരള വെറ്ററിനറി ആന്‍ഡ്‌ അനിമൽ സയന്‍സസ്‌ യൂണിവേഴ്സിറ്റി (കെ.വി.എ.എസ്‌.യു.), കേരള യൂണിവേഴ്സിറ്റി ഓഫ്‌ ഫിഷറീസ്‌ ആന്‍ഡ്‌ ഓഷ്യന്‍ സ്റ്റഡീസ്‌ (കെ.യു.എഫ്.ഒ.എസ്.‌), കേരള അഗ്രികള്‍ച്ചറല്‍ യൂണിവേഴ്സിറ്റി (കെ.എ.യു) എന്നിങ്ങനെ വിഭജിച്ചു.

നിലവില്‍ സര്‍വ്വകലാശാലയ്ക്ക്‌ അഗ്രികള്‍ച്ചര്‍, അഗ്രികള്‍ച്ചറല്‍ എഞ്ചിനീയറിംഗ്‌, ഫോറസ്ട്രി എന്നീ വിഭാഗങ്ങളിലായി എട്ട്‌ കോളേജുകള്‍ (നാല് അഗ്രികള്‍ച്ചര്‍, ഒരു അഗ്രികള്‍ച്ചറല്‍ എഞ്ചിനീയറിംഗ്‌, ഒരു ഫോറസ്ട്രി, ഒരു കോ-ഓപ്പറേഷന്‍ ബാങ്കിംഗ്‌, ഒരു ക്ലൈമറ്റ്‌ ചേഞ്ച്‌ ആന്‍ഡ്‌ എന്‍വിയോണ്‍മെന്റല്‍ സ്റ്റഡീസ്‌), ആറു പ്രാദേശിക കാര്‍ഷിക ഗവേഷണ ക്രേന്ദങ്ങള്‍, എട്ട് കൃഷി വിജ്ഞാന ക്രേന്ദങ്ങള്‍ 15 ഗവേഷണ സ്റ്റേഷനുകള്‍,16 ഗവേഷണ-വിജ്ഞാന വ്യാപന യൂണിറ്റുകള്‍ എന്നീ സ്ഥാപനങ്ങള്‍ ഉണ്ട്‌. കൂടാതെ, ഡിപ്ലോമ ഇന്‍ അഗ്രികള്‍ച്ചറല്‍ സയന്‍സസ്‌ വാഗ്ദാനം ചെയുന്ന ഒരു ഇന്‍സ്റ്റിറ്റൂട്ട്‌ ഓഫ്‌ അഗ്രികള്‍ച്ചറല്‍ ടെക്നോളജിയും കേരള കാര്‍ഷിക സര്‍വ്വകലാശാലയുടെ കീഴില്‍ പ്രവര്‍ത്തിക്കുന്നു.